奧格斯堡夠本錢拆「紐」

猪拉多纳

南韓雙星上晒力

「德甲星期五」有韓日大戰上演，奧格斯堡主場對紐倫堡有直播睇，捧主W應該會睇得安心啲，事關奧格斯堡嘅南韓射手池東沅同中場具滋哲齊齊上力；相反，紐倫堡嘅日本國腳清武弘嗣有傷在身，紮住踢靠唔住。

（有線64及203周六凌晨3:30直播）
紐倫堡清武弘嗣紮住踢

冬季轉會市場期間，池東沅離開新特蘭以借用身份加盟奧格斯堡，一嚟到即獲主帥信任連續7場聯賽打正選，上個月對賀芬咸仲成功開埋齋添，狀態同信心兼備。佢位同鄉具滋哲經過季初養傷後，一復出有貨交成為必然正選，今季聯賽暫時攻入3球，交出2次助攻。現時奧格斯堡落後倒數第4位嘅禾夫斯堡6分，要脫離護級區域實搏，中場丹尼爾拜亞停賽都唔怕。

對家紐倫堡連和4場走勢明顯轉差，最慘係德國傳媒報道，清武弘嗣加入內田篤人、長友佑都同本田圭佑嘅東瀛傷兵大軍，佢喺上場以1:1打和弗賴堡嘅賽前操練已覺得背脊有傷，最後頂硬上表現走晒樣，甚至被《踢球者》評為紐倫堡表現最差嘅球員之一，加上射手普爾達今場停賽，睇怕紐倫堡都好難搶到分落袋。