奈梅亨入球騷有著「諾」

猪拉多纳

魔鬼教頭操到成隊波噴火

奈梅亨會喺今晚荷甲迎戰重返前列嘅飛燕諾，主隊靠住教頭柏斯托嘅魔鬼式操練踢出水準，撞正飛燕諾近況回勇兼有王牌前鋒踢到着晒火，雖然未知鹿死誰手，但就絕對係合演入球騷嘅好機會，一於熱捧1.62倍入球大。

（now639台周日晚7:30直播）

奈梅亨嘅名氣雖遠不及飛燕諾，但佢哋近5場贏足4場，近11場主場賽事更有10場保持不敗，全賴教練柏斯托唔主張輪換，所以將成班主力操到一個禮拜踢足5場波都冇問題！而且前鋒柏拉特積近3場入3粒，狀態弗到漏，所以柏斯托都好有信心咁話奈梅亨今場會搏甩髀同飛燕諾鬥攻。
飛燕諾射手當弗鬥攻

飛燕諾今季嘅作客表現的確難以令球迷收貨，近6場只係贏過1次咁大把，不過見佢哋早排經歷3場不勝後，近4戰贏咗3場似乎已經走出低潮，而且今季已經入咗18球嘅王牌前鋒加斯安奴柏利近3場作客入足4球，堪稱飛燕諾嘅客場救世主，有佢喺度，要同奈梅亨駁火做「大」騷冇問題！