馬拉加追打疲兵 主場W「德」

猪拉多纳

爭歐聯入場券不容有失

今晚西甲有場前列球隊對碰，由第4位嘅馬拉加喺主場迎戰「老二」馬德里體育會。正力爭下屆歐聯入場券嘅馬拉加，隨住近期兩連敗後已經不容有失，最緊要係嚟緊周中佢哋唔需要兼顧歐聯賽事，無後顧之憂，主場出擊，係時候重返勝軌。反觀喺近22日以來踢第7場波嘅馬體會，睇怕鐵人都頂唔順，一於撐馬拉加2.7倍主勝。

（now632台周一凌晨2:00直播）

西甲今季爭逐歐聯最後入場券形勢緊湊，特別係當馬拉加上周作客淨吞貝迪斯3蛋之後，由第4位嘅馬拉加到第7位嘅貝迪斯，其實只係相差3分，形勢七國咁亂。要解釋馬拉加上仗突然表現走樣，相信唔多唔少同歐聯後遺症有關，始終歐聯每晉一級都有可觀獎金收入，球員點會唔去到盡？之後返嚟聯賽表現跌Watt自然可以理解。不過經過足足一個星期嘅調整同恢復，相信佢哋可以踢番出最佳水準，特別係前線球員已經有兩場比賽食白果，沙維奧拿同辛達告魯斯都磨刀霍霍，等住今晚喺主場球迷面前威番鋪。
馬體會踢到殘回唔切氣

馬體會周中喺西班牙盃次回合作客以2:2踢和西維爾，兩回合以4:3淘汰對手殺入決賽，但喺歐霸盃就因為頻密賽程，最終過唔到魯賓卡山一關，宣布衞冕失敗，今晚疲兵再戰，回唔回到氣都好難講。再者，馬體會家陣可以做到聯賽二哥，張峰認為完全同佢哋主場13戰全勝嘅無敵成績有關，講到作客表現，12戰得5勝2和5負，根本唔算突出，面對住實力分子馬拉加，仲要有中場基比停賽，輸埋都唔出奇啦！