新大佬好波銀河滅「火」

猪拉多纳

小妹之前因為想睇碧咸，好多時都專登早起身搵Link睇波，雖然銀河家陣冇咗「萬人迷」，不過都仲有愛爾蘭射手羅比堅尼、靚仔門神古迪仙尼撐場，實力唔會衰得去邊嘅，聽朝佢哋喺美職第一擊迎戰芝加哥火燄，一於熱熱哋玩個1.73倍主W啦！

老實講吖，小妹細細個學睇波嗰陣，都係留意靚仔先嘅，好似碧咸咁有型顧家有愛心好波兼勤力嘅男人，絕對係稀有品種，家陣人大咗，就自不然以球技人品行先啦，唔靚仔都冇所謂嘅，好似羅比堅尼咁，個樣順眼、好波、冇緋聞咪得囉，呢位32歲射手今季孭起成隊銀河，責任同壓力係就係大咗好多，不過大家唔使擔心喎，羅比仔一向都做慣隊長，家陣銀河冇咗碧咸，可能「新大佬」嘅表現會仲搶眼啲呢！
芝加哥火燄新兵二打六

係，雖然銀河首席射手當路雲繼續留喺柬埔寨度假，要到3月底先歸隊，但查實呢件美國國腳麻煩多多，之前碧咸喺度又唔妥佢，家陣羅比堅尼做新隊長，當路雲又借頭借路話想考慮前途玩隱閉，冇咗呢條麻煩友，上季總冠軍銀河，分分鐘Run得仲順啲添！

對家芝加哥火燄季前入咗3件新兵，分別係防守中場拉倫杜域治、連特佩利，同埋前FC多倫多前鋒阿馬歷華，論名氣同級數，相信都冇乜人會識佢哋，更何況一時間變動咁大，要夾都要時間o架，睇埋近3次對賽，佢哋都要輸畀銀河，今鋪點都唔似有條件成功復仇囉！
微博傳情：過濠江贏錢贏友誼

自從踏入蛇年後，小妹啲運氣真係返晒嚟，上星期同班Friend去澳門玩，誤打誤撞之下竟然贏到唔少錢，哈！贏錢雖然開心，不過錢銀嘅嘢，夠使咪得囉，最開心同最重要嘅，其實係成班朋友仔可以趁機聚一聚，飲飲食食嘻嘻哈哈，贏輸？又有乜所謂吖！
Sherry推介：銀河（勝）