里爾當弗追殺波爾多

猪拉多纳

今日阿King集中講法甲，重心放在尾場里爾主場對波爾多。里爾自從沙洛文卡勞踢完非國盃後愈戰愈勇，聯賽三連勝重燃參加歐洲賽希望。波爾多近期兼顧聯賽、法足盃及歐霸盃三條戰線，表現開始有疲態，里爾主W有1.72倍可作為過關重心。

（周一凌晨4時開賽）

沙洛文卡勞喺英超發展一般，但以佢級數嚟到法甲真係打橫行，雖然今季佢喺聯賽只係入咗三球，不過就激活咗另一名前線球員皮耶，皮耶今季聯賽射入十球，而且交出十個助攻，排聯賽榜助攻第一位。睇番早前沙洛文卡勞離隊參加非國盃，里爾喺一月份三場聯賽都贏唔到，但當佢回歸之後，球隊連續四場一口氣拿下十分，近三場更全部贏晒，狀態返晒嚟。里爾目前落後第三位嘅馬賽六分，仍有機會爭奪一張歐聯入場券，就算球隊上周中於法足盃被淘汰，仍無損球員鬥志及信心。

波爾多上周中於法足盃跟低組別羅恩激戰一百二十分鐘，最終憑互射十二碼險勝過關，對體力消耗極大，唔好忘記佢哋仲要兼顧歐霸盃，之前兩回合激戰基輔戴拿模，已經搞到聯賽三連敗，周中佢哋又要作客賓菲加踢十六強首回合，賽程太密，今場一於簡單捧主Ｗ。
串里昂客Ｗ馬賽細

另外兩場法甲，比斯特主場對里昂，比斯特對上六場主場輸五場，上周於法足盃作客亦淨吞羅連安特三蛋，狀態一般。里昂聯賽兩連勝，而且上周中冇比賽，歐霸盃亦已出局，養精蓄銳應該有理想發揮，捧1.76倍客W。最後馬賽主場對特魯瓦，馬賽連輸兩場國家打吡損士氣，返主場要踢爭氣波，不過特魯瓦近五場聯賽不敗，護級露出一線曙光，求勝決心唔輸蝕，最好捧細盤。