皇馬半場擺和頭酒

猪拉多纳

11pm國家打吡半力迎巴塞

西班牙國家打吡破天荒香港時間今晚11點開波！剛周中西班牙盃四強次回合皇馬作客魯營贏波贏牙骹，但「銀河艦隊」下周中歐聯將要同曼聯上演生死戰，相信皇馬今晚主場出擊唔輸都收貨，加上兩軍聯賽積分相距太遠，和波對巴塞亦冇壞，大家唔急於進攻下，「半場和」博得過。

（now 632周六晚11時直播）

好多人認為莫連奴係要面嘅人，主場出擊點會龜縮咁衰仔，咁樣諗法唔可以話錯，但又啱唔晒。莫帥唔單止係個要面嘅人，仲喺一個實是求是、目標為本嘅教練。如果相對下周中作客奧脫福場歐聯十六強次回合，喺巴拿貝贏巴塞只係粉飾工程，攞到歐聯冠軍先至係最有體面嘅事。
留力歐聯對紅魔

賽前陣營消息已經指出，莫連奴會收起七名主力，只會畀迪亞高洛迪古斯、艾比路亞同基斯坦奴朗拿度等主力上陣，其餘有機會正選嘅包括艾辛、莫迪歷等中場球員，侵略性冇咁強，面對巴塞相對輸蝕。從實際上睇，皇馬落後巴塞16分，差唔多肯定衞冕失敗，今場仲搏嚟做乜先。不過班二線球員亦唔會放過正選機會，莫帥今場亦起碼唔想輸，半場守住巴塞，睇吓乜料再謀後動。

巴塞今場亦有憂慮，踏入2013年，巴塞作客成績差強人意，七場作客竟有四場贏唔到，包括輸畀皇家蘇斯達及ＡＣ米蘭，就算反勝ＣＦ格蘭納達之役都係靠美斯單天保至尊，贏得好辛苦。美斯剛周中對皇馬後仲發燒，今仗未必上陣搏殺，而且一月尾巴塞在西班牙盃四強首回合作客皇馬亦係半場互交白卷，有績可尋下，「半場和」值追。