愛華頓砌雷丁 形勢大好

猪拉多纳

英超教頭呢個位真係一啲都唔易做，車路士主帥「肥賓」賓尼迪斯對外抱怨話加盟以來，一直唔受球會同球迷尊重，仲話今季季尾一定走人。其實佢又未必錯晒嘅，班主阿布拉莫域呢季不停高調去物色新領隊；喺比賽嗰陣，班車迷亦唔顧「肥賓」感受，所唱嘅所謂「打氣歌」原來啲歌詞係「諦」佢嘅，佛都有火啦！咁多年來，能夠坐得穩喺同一間球會嘅數埋無幾多個，「費蛇」同雲格都係好例子；另愛華頓嘅莫耶斯都帶咗「拖肥糖」10季，今季成績都唔錯，睇怕想炒佢都難啦！今晚愛華頓主場對要護級嘅雷丁，兩邊都有搶分嘅理由，今場一於推介入球大！
費蘭尼復出入波保證

愛華頓經過4場不勝後，周中終於喺足總盃贏波，淘汰奧咸。喺嗰場被收起嘅中場「爆炸頭」費蘭尼今晚會落場，佢依家有10個聯賽入球同3次助攻，係隊中舉足輕重人物。今季愛華頓主場數據好勁，只曾經輸過畀車路士；兼且咁多場係得1場主場比賽冇進帳，今晚面對後防不穩嘅雷丁，幾乎可以肯定會入到波。

雷丁呢排運滯，經歷6場比賽不敗後連輸3場，護級前景令人擔心。佢哋喺今季所有作客嘅賽事都有失球，聯賽總失球數目仲係英超次高嘅添！27場比賽共失51球，今晚又點可以保住不失？前鋒普格恩耶克喺上場對韋根領紅牌被逐，今仗停賽，攻力進一步被削，贏面極低。街外莊家亦開主勝熱至1.37左右，亞洲盤讓1球/球半或球半高水，以今晚「拖肥糖」人腳，絕對有力大炒對手，預計入球仲會頗多添！

（有線302及202台周六晚11時直播）