日職殺到雙紅抗「箭」

猪拉多纳

仲有「角球大細」任你玩

日職雙「紅」攜手抗「箭」！2013日職聽日開打，Big3嘅鹿島鹿角、浦和紅鑽同大阪飛腳，今季喺飛腳降落日乙後，只係剩番兩支「紅軍」「相依為命」，為求將衞冕冠軍廣島三箭拉落王座，雙「紅」喺轉會市場「打龍通」提升實力，真係好睇過戲。而且足智彩今季仲會加入「角球大細」呢樣玩法，總之今季日職就好睇又好玩啦！
鹿角 紅鑽「默契」增兵達雙贏

自日職05年改為主、客雙循環制後，鹿島鹿角先後3奪冠軍，亦係唯一一支成功「冧莊」嘅球隊，戰績冠絕同儕。不過，佢哋上季進入重整期，一度捲入降班漩渦，雖然最後逃出生天，但其實一樣羞家。會方新季搵來舊帥施里蘇回巢，呢位巴西名將曾經喺00至05年執教鹿角，期間率領球隊贏得2次日職總冠軍、2次聯賽盃冠軍同1次天皇盃冠軍，今次佢崔護重來，當然值得期待。

兩支日職「紅軍」本來關係唔算好，但由於有共同敵人，所以季前喺轉會市場充滿默契。佢哋本來爭緊甲府風林高產射手達維，最終紅鑽讓路。之後鹿角則投桃報李，送番個箭頭興梠慎三畀對方，造成雙贏局面。鹿角繼而再由降班球隊神戶勝利船簽番舊將野澤拓也，配合前線新兵大迫勇也同老牌指揮官小笠原滿男，人強馬壯。
廣島三箭不變 多線作戰艱難

至於紅鑽教頭柏度域仲醒，佢直接由大敵三箭撬走舊部森協良太，一招損人利己夠晒高明，仲要保留住兩大進攻主力原口元氣同柏木陽介，陣容鼎盛，睇嚟佢想向舊東家示威嘅決心相當強大。唔係講笑，柏度域06至11年帶領廣島三箭得個吉，上年轉教紅鑽後，三箭反而成為日職冠軍，慘被剃眼眉，唔嬲就假！

面對「雙紅」夾擊，「紫軍」廣島三箭實行以不變應萬變，季前喺轉會市場並無任何重磅收購。「反骨仔」森協良太離隊後，水本裕貴頂上成後防重心，前線雖然繼續靠王牌射手佐藤籌人單天保至尊，上周就正正係靠佢，先喺日本超級盃射死柏雷素爾，問你服未？只係球隊都有重大弱點，後備力量不足嘅佢哋，新季要兼顧亞冠盃，加埋國內盃賽三、四線作戰，打到季尾隨時搏殘，要成功衞冕難度唔細。
賽制

18隊採雙循環制，勝得3分，和得1分，負得0分；以積分多寡釐定名次。

若出現同分情況，將按以下的準則來確定名次：

1.較佳的得失球差

2.較多的得球

3.同分球隊的對賽成績

4.較少的紅黃牌數目

5.抽籤

降班隊數：3隊，排名16，17及18位的球隊自動降班。

參加亞洲聯賽冠軍盃隊數：4 隊，聯賽前3名，以及天皇盃冠軍。