松鼠雙槍射停心跳

猪拉多纳

日職球隊大宮松鼠上年成功保住日職席位，全靠季中搵咗斯洛文尼亞教頭維迪尼克幫手，維帥新季繼續重用兩個同鄉路華高域及隆比真歷打江山，一對斯洛文尼亞國腳級射手組成長人鋒線，誓成日職列強後防噩夢，首戰主場對清水心跳有力打響頭砲！（周六下午3時開賽）

松鼠上季護級形勢危急，全靠會方當機立斷喺上年六月聘用斯洛文尼亞教頭維迪尼克救亡，佢即時周圍班救兵，最終搵到同鄉路華高域及隆比真歷助拳，前者身高超過一米九，曾為德國球會科隆轟入超過七十球，後者都有一米八六，屬比利時勁旅亨克舊將，兩個雷霆救兵季尾連番士哥成為球隊護級英雄，維迪尼克直頭被捧上神枱。松鼠新季人腳冇乜郁過，主要得日本中場小國腳東慶悟離隊，影響唔大，斯洛文尼亞將帥鐵三角繼續拍住上，預期可企穩中游。

清水心跳就有唔少變動，上季首席射手大前元紀去咗德甲搵食，澳洲箭頭保斯基同老牌前鋒高原直泰亦相繼離隊，新季簽到前大阪飛腳射手巴爾，呢個巴西前鋒踢日職時期出名高產，但08年離開飛腳後去咗中東掘金超過四年，回歸冇耐仲要重新適應日職比賽節奏，加上要同班隊友建立默契，難以即時起作用。心跳隊內仲有石毛秀樹、白崎凌兵及高木俊幸等九十後新星，前景絕對唔差，但講到尾都係要時間再磨合，暫時惡唔出樣。