鹿角紅鑽三箭連環鬥

猪拉多纳

日職周末開波喇 角球大細都有得玩！

日職雙「紅」合力抗「紫」！日職「紫軍」廣島三箭上季異軍突起首度奪冠，名牌球隊大阪飛腳意外降班，令日職Big3僅剩兩支「紅軍」鹿島鹿角及浦和紅鑽。鹿角搵番名帥施里蘇回巢，一心重建王朝；紅鑽續以三箭舊帥柏度域領軍，力阻「紫軍」冧莊。「雙紅」季前喺轉會市場眉來眼去，有心夾計砌低三箭，柏度域仲大打人情牌撬走三箭後防猛人森協良太，喺季前已經明爭暗鬥，今個周末日職新季殺到埋身，必定好戲連場！

自日職05年改成主、客雙循環制後，鹿島鹿角先後三奪冠軍，亦係唯一一支成功衞冕嘅球隊，戰績冠絕同儕。不過，佢哋上季進入重整期，一度捲入降班漩渦，非常羞家。

鹿角新季搵來巴西名將兼舊帥施里蘇回巢，佢曾經喺00至05年執教鹿角，期間率領球隊贏取兩次日職總冠軍，兩次聯賽盃冠軍及一次天皇盃冠軍，堪稱一代盃王，今次重掌鹿角，矢志幫球隊止跌回升。至於柏度域06至11年帶領廣島三箭得個吉，上年轉教紅鑽後，三箭即成為日職冠軍，慘遭剃眼眉，唔嬲就假！
雙紅增兵互惠互利

兩支日職「紅軍」本來關係唔算好，但由於有共同敵人，所以季前喺轉會市場充滿默契。佢哋本來爭緊上季由烏姆沙拉爾外借至甲府風林嘅高產射手達維，最終紅鑽讓路，鹿角投桃報李送番個箭頭興梠慎三畀對方，造成雙贏局面。

鹿角再由降班球隊神戶勝利船簽番舊將野澤拓也，配合前線新兵大迫勇也同老牌指揮官小笠原滿男，人強馬壯。紅鑽教頭柏度域更醒，佢直接由大敵三箭撬走舊部森協良太，一招損人利己非常高明，佢仲要留住兩大進攻主力原口元氣同柏木陽介，陣容鼎盛，有條件超越上季季軍成績。
佐藤壽人孭起三箭

面臨「雙紅」夾擊，「紫軍」廣島三箭實行以不變應萬變，季前喺轉會市場並無任何重磅收購，「反骨仔」森協良太離隊後，水本裕貴頂上成後防重心，王牌射手佐藤壽人上周又喺日本超級盃射死柏雷素爾，繼續於前線單天保至尊。

三箭一班正選夾慣夾熟戰鬥力強，不過，球隊後備力量不足，新季要兼顧亞冠盃，加埋國內盃賽三、四線作戰，戰至季尾隨時搏殘，衞冕難度甚高。
日職首輪賽程

(六)1 大阪櫻花 Vs 新潟天鵝 周六1:00pm

(六)2 名古屋鯨魚 Vs 磐田山葉 周六1:00pm

(六)3 鳥棲砂岩 Vs 鹿島鹿角 周六1:00pm

(六)4 廣島三箭 Vs 浦和紅鑽 周六1:00pm 有線148台、now711

(六)5 仙台維加泰 Vs 甲府風林 周六1:00pm

(六)6 橫濱水手 Vs 湘南比馬 周六1:00pm

(六)8 大宮松鼠 Vs 清水心跳 周六3:00pm

(六)10 大分三神 Vs FC東京 周六6:00pm

(日)2 柏雷素爾 Vs 川崎前鋒 周日中午12時
2012 佐藤壽人(廣島三箭) 22球

2011 約舒亞堅尼地(名古屋鯨魚) 19球

2010 前田遼一(磐田山葉)、 約舒亞堅尼地(名古屋鯨魚) 17球

2009 前田遼一(磐田山葉) 20球

2008 馬昆奴斯(鹿島鹿角) 20球

2007 祖尼奴(川崎前鋒) 22球