車仔撞米堡炒「大」鑊

猪拉多纳

賓帥領軍輸完例反彈

英超名牌球隊車路士喺英格蘭足總盃16強作客米杜士堡，車仔啱啱喺聯賽被曼城k.o.，眾星谷埋一肚火，今次對住英冠仔正好係發洩最佳機會。自賓尼迪斯接手後，佢哋每次輸波後下一場例必贏波反彈，仲要次次都大勝，繼續跟住條攤路搵食，要入球大，可兼顧「讓球客勝」！

（now 635周四凌晨3時45分直播）

車路士上場對曼城處下風，但如非林柏特射失十二碼已經有機會搶分，場波輸得有啲唔抵，班兵心情肯定好曳，家陣佢哋已經跌落聯賽第四位，連歐聯席位都未必保得住，主帥賓尼迪斯責無旁貸，班球員亦冇可能獨善其身，如果唔想季尾畀人掃走，點都要交番多少成績出嚟，足總盃絕對係將帥救命賽事，絕對不容有失。

賓尼迪斯自去年十一月尾上任至今輸咗六場，有一點值得留意，喺賓帥帶領下，佢哋從未試過兩連敗，而且每次輸完下一場班球員就會醒晒大炒對手，包括喺盃賽狂數列斯聯同修咸頓五比一，今次又逢盃場賽合，對手只係英冠仔，又係時候燒慶個鑊炒人！大軍只有中場奧里奧爾羅美奧養傷，其餘主將都踢得，可以全力搏殺。
米杜士堡兵疲跌Watt

米杜士堡陣內有唔少熟悉面孔，守將活基治、賀迪同中場戴亞等都有英超經驗，人腳唔曳。佢哋今季全力爭取升班席位，但對上六戰輸四場，戰至最後直路明顯腳軟，一眾球員搏咗大半季，家陣身心俱疲，大軍後備力量不及車仔，今戰主場出擊都好難頂得住，隨時大敗收場。