巴塞「雪人翻生」o趙皇馬

猪拉多纳

效率王韋拿落場有貨交

國家打吡大舞台上演「雪人平反戰」！巴塞隆拿今晚將於西班牙盃4強戰次回合惡鬥皇家馬德里，首回合賽和1:1嘅「地上最強」雖然有作客入球喺手，但佢哋近排防守唔穩陣，今晚返到魯營實行要由「鹹魚翻生」嘅韋拿領導鋒線以攻代守，要擊破中場線唔多掂嘅皇馬唔難，讓半一上盤值得一博！

（now632台周三凌晨4:00直播）
坐多過踢照做次席射手

韋拿腳傷好番後一直慘遭雪藏，但呢位「雪人射手」喺上仗聯賽飾演「救世主」幫巴塞扳平，受盡各方讚賞兼獲魯營球迷起立拍掌致敬。賽後唔止助教勞拉盛讚呢位「狂牛前鋒」把握力強，維蘭路華亦講明會重用佢多啲，美斯更點名大讚韋拿幫佢製造唔少機會！撞啱今季巴塞防線唔掂，失球數大幅上升，家陣惟有以攻代守，亦係呢個31歲射手重奪正選位置嘅好時機！

呢位西班牙第一射手表現的確有目共睹，即使連環受腳傷同腎石困擾，今季上陣僅24場兼大部分係後備嘅情況下，仍然攻入12球列巴塞次席射手，比成季上陣30次入得4球嘅阿歷斯山齊士有威脅得多。親巴塞嘅西班牙《體育報》亦指出，美斯拍住法比加斯同柏度洛迪古斯嘅組合效果根本唔理想，擺明向巴塞施壓要求換人啦！仲有項數據支持呢個射手，就係韋拿喺職業生涯中曾5度射破皇馬門將迪亞高洛迪古斯十指關，今場有望再做「福將」㗎！
莫迪歷被寸踢唔出身價

皇馬嘅沙比阿朗素同賓施馬啱啱先復操，狀態肯定唔係最弗，更慘嘅係上年夏天兩大收購莫迪歷同艾辛表現唔理想，其中以超過3,000萬鎊（約3.5億港元）身價空降巴拿貝球場嘅莫迪歷，上仗對拉科魯尼亞嘅表現更慘遭西班牙《馬卡報》批評「證明唔到自己」，《機密報》直情形容佢兩個係莫連奴嘅最差收購，就算沙比未夠弗都冇人幫到手，難怪皇馬近7場作客僅得2勝啦！佢哋主場應付人腳級數較差嘅曼聯都贏唔到，今鋪對住巴塞都難逃慘敗喇！

首回合：巴客和1:1
皇馬盃賽作客例失波

‧巴塞近6次主場對皇馬取得2勝3和1負成績。

‧巴塞今季主場不敗。

‧皇馬6場盃賽作客都有失球。
中位數3.5球照捧入球大

皇馬爭出線今場一定要爭取作客入球，巴塞亦已連續11場失波，睇怕難擋皇馬攻勢。翻查記錄，巴塞近3次盃賽主場對皇馬全部至少有4個入波，即使今場入球中位數升到3.5，1.97倍入球大照樣可捧。
西班牙盃賽制

今輪為4強次回合，賽事採兩回合主客制，並計算作客入球。若兩回合總比數打和，會在次回合90分鐘後加時30分鐘，依舊計算作客入球。若雙方加時互交白卷，則互射12碼決勝。