愛華頓「大」炒奧咸

猪拉多纳

足總盃重賽補鑊冧番莫帥

英格蘭足總有場16強重賽，英超「拖肥糖」愛華頓主場對英甲球隊奧咸。上次奧咸主場逼和對手二比二，搞到愛華頓領隊莫耶斯出席記者會時黑口黑面，狠批球員未有好好把握領先優勢。今次返回主場再鬥奧咸，「拖肥糖」唔會再犯相同錯誤。基於兩隊級數差距較大，愛華頓仲有埋主場之利可謂如虎添翼，今場可望大炒對手，大細中位數調至3.5球，阿King認為大盤可放心捧場。

（周三凌晨3時45分開賽）

剛舉行過嘅英聯盃決賽，證明低組別球隊缺少主場之利係好難威脅到英超隊伍，情況同今場愛華頓對奧咸一樣。只要愛華頓唔好再輕敵，踢奧咸出局根本唔係難事。雖然話「拖肥糖」近績麻麻哋，但要留意佢哋連續三場都係作客，球隊發揮未及預期可以理解，球員畀莫耶斯省完一大餐之後，相信今次回師葛迪遜公園球場肯定有唔同演出。
奧咸作客難再偷雞

奧咸於聯賽兩連勝係威係勢，但所擊敗嘅樸茨茅夫及史提芬納治都係英甲中下游球隊，未遇過強勁對手不足以反影奧咸有能力打低愛華頓。阿King研究過好清楚今場係強弱懸殊格局，愛華頓主場出擊大捷可期，大盤有分頭係唔錯嘅選擇。