鍾仔扑濕熱刺

猪拉多纳

紀念卜比摩亞逝世廿周年

為紀念「錘仔傳奇」卜比摩亞逝世廿周年，韋斯咸誓搏盡扑濕熱刺！周二凌晨英超上演「倫敦打吡」，韋斯咸夠晒爭勝動力，加上本季近8成主場不敗率夠殺；熱刺剛於歐霸盃搏到殘，加里夫巴利做唔到一世救世主，作客讓平半捧下盤！（有線300及200台周二凌晨4時直播）

英格蘭1966年擊敗前西德勇奪世界盃，卜比摩亞就係當時「三獅兵團」隊長，而呢名曾代表國家隊109次嘅名將，其光輝歲月就喺韋斯咸度過。93年2月24日卜比摩亞離世，終年51歲。為紀念呢位「錘仔幫」一代傳奇，當地有各式各樣紀念活動，今次韋斯咸適逢於主場迎戰同市熱刺，就特別有意義，一眾「錘仔兵」肯定希望以勝仗嚟紀念前輩。
熱刺攰到口擘擘

領隊艾拿戴斯賽前深信球隊能以弱勝強，就係因為超勁主場威力。本季韋斯咸16次主場出戰，只曾輸過4場，不敗率近八成；踏入2013年後主場保持不敗，更曾幾乎贏埋曼聯。今戰兩名後防大將占士哥連斯同祖爾奧拜恩傷愈復出，力足頂住熱刺。

熱刺剛於歐霸盃作客里昂，雖然最後晉級，但一班正選搏到好盡，除「力王」加里夫巴利外，好多球員都打到口擘擘，呢場未必回得切氣。相反韋斯咸就剛到杜拜享受陽光催谷狀態，今場主場受讓平半，筍到爆啦。