曼聯波飛？我都冇呀！

猪拉多纳

近日熱門話題一定係曼聯訪港，唔少球迷都為門票左撲右撲。Peter大膽講句，環顧全球隊際體育當中，曼聯肯定係最多粉絲嘅球隊，如果香港大球場有十萬座位都一樣爆棚。仲有一點，因有大量門票已預留畀相關單位及組織，所以普羅球迷唔易買到，就連圈內人都一票難求。實在最近有唔少朋友打電話畀Peter，第二句就問有冇10張曼聯門票。你問我，我問邊個呀？
門票轉贈Ｔ醫生

最近農曆新年Peter食得煎炸嘢多搞到成口「飛滋」，所以喺電話度都唔方便逐個回答，Peter惟有借專欄一次過同大家講，真冇多餘票可以放畀大家。一來小弟已經年老、二來又唔擦鞋、三來又唔屬於任何一間球會，根本唔會有大量門票。本來經訂購買到２大張，但已經轉送畀Ｔ醫生。呢位Ｔ醫生係Peter死黨，除多年來照顧我之外，亦照顧過米雪同埋尹佬。之前佢因患上大病做過一次手術，自言今日能站起來繼續行醫可謂相當之幸運。Peter為答謝Ｔ醫生，所以張僅有２張門票送咗畀佢。朋友們原諒我吧，give me a break！

金句：你問我，我問邊個呀？