維拉唔怕爆廠仔

猪拉多纳

連搶4分信心返晒嚟

喺酋長球場接連輸波嘅阿仙奴，無論士氣、信心都跌至谷底，今晚返英超就算再有主場之利，但係對住狀態回勇兼矢志搶分護級嘅阿士東維拉，想話贏波重振軍心怕且唔易，維拉3.7倍+1「讓客」值博。

（有線201及301周六晚11:00直播）
阿仙奴左右閘齊打柴

阿仙奴喺英總畀布力般流浪淘汰，歐聯又輸鑊甘嘅畀拜仁瀕臨出局邊緣，面對主場接連失利，今晚再喺酋長球場鬥護級分子，領隊雲格梗係想贏波振奮吓班「廠仔」嘅士氣啦，不過想同做始終係兩回事，先唔理阿仙奴體力蝕晒章，淨係計左閘基蘭基比斯養傷，右閘沙格拿膝頭有傷又要抖埋一份，想贏波？搞掂條紙紮防線先啦！

另邊廂，早前深陷降班危機嘅阿士東維拉，繼作客同前列嘅愛華頓打和3:3後，跟手主場仲砌低埋韋斯咸，接連搶到4分，總算暫時逃離降班區域，季初嘅士氣同信心都返晒嚟，憑住近期嘅勇態，加埋近6場入6球嘅賓迪基喺前線數胡，今晚應該至少有1分落袋。