阿仙奴維拉「大」騷救命

猪拉多纳

近排歐洲球圈其中一個焦點，肯定係阿仙奴。兵工廠足總盃畀布力般踢出局，今季兩個本土盃賽都被低組別球隊砌低；喺歐聯又完全唔夠拜仁踢，今季幾乎又冇盃落袋。喺球迷角度睇，班波咁曳領隊雲格難辭其咎，若非佢咁識為球會搵錢，應該已經被炒！

阿仙奴自05年奪得足總盃後，就冇攞過任何冠軍，球迷等了又等，但一次又一次咁失望，本季仲要畀巴拉福特、布力般流浪等「二打六」淘汰，又點會唔心傷？出到歐聯對拜仁，就好似細路同大人踢一樣，主場都輸1比3。

近年開轉會窗前，就會傳出雲格有勁多「畢直」增兵，但佢最後每每只買幾件平貨算數。有人質疑係班管理層講大話，話畀又唔畀；但雲格唔講，球迷當然係入晒佢數。作為一個領隊，雲格屬有料之人，但佢臨場調動處理未去到頂級；而自負嘅性格，亦令佢深信細路可戰勝大人，但事實證明，呢條數係計唔掂。以戰績論，雲帥實難保烏紗，但佢年年為球會搵大錢，睇嚟管理層唔捨得郁佢。
一隊爭前四 一隊要護級

目前兵工廠剩番一個目標，就係爭入聯賽前4，雖然目前球隊士氣處於谷底，但今晚英超主場對阿士東維拉，球員都會用最專業嘅態度應戰。事實上，兵工廠主力如禾確特、辛迪卡索拉、普多斯基等，係恰到英超中下游球隊，細鬼深信佢哋能夠入波。但阿仙奴後防長期不穩，維拉前鋒賓迪基又好弗，而且搶分護級心切必攻，睇番維拉近4次作客阿仙奴全數開大，今場可再追。

（有線301及201台周六晚11時直播）