侯城布力般歎慢板捱細界

猪拉多纳

周中英冠開快車，阿King重點推介侯城主場對布力般流浪，要入球細。侯城喺布魯士執教下踢悶蛋足球，但換來上佳戰績，當然要繼續用呢套策略爭取升班資格。布力般剛於足總盃惡鬥完阿仙奴，未必回到氣，應會歎慢板，預料今場係入波偏少嘅悶戰。

（周三凌晨3時45分開賽）

布魯士今季接手侯城後，目標為本只求分數、不求悅目，所以佢哋即使位居第二位，但入球數字仲少過尾二嘅布里斯托城。不過亦因為布魯士嘅穩健作風，球隊先至有目前成績，球迷亦欣然接受悶蛋足球，令布帥更堅定不移地「煲魚生粥」。
錫周三抖足砌阿伯

布力般本身踢法粗枝大葉，擅長破壞多於建設，所以先至可以剋死「技術流」阿仙奴。不過布力般上仗畀兵工廠圍攻，消耗好多體力，尤其係佢哋人腳有限，難以採取輪換，今仗匆匆鬥侯城恐怕惡唔出樣。再睇雙方近七次交手，六次開細，值得再追。

另外兩場英冠，伯明翰主場對錫周三，客軍上周末冇波踢，體力上有優勢，而且伯明翰狀態走下坡，剛遭受大敗打擊，讓波捧對家。屈福特貫徹大盤王本色，近十仗九次開大，今場作客葉士域治，入球大可期。