紅魔狂鋒掃「雷」

猪拉多纳

4大箭頭勁過「3冠王朝」

英格蘭足總盃16強今晚仲有好戲上演，曼聯喺主場對雷丁要捧1.57倍「讓球主勝」。今季紅魔順到難以置信，領隊費格遜甚至話，現時嘅曼聯勁過99年「3冠王」時代，仲講明會進行輪換同提醒班球員唔好大意睇小雷丁，信心爆棚得嚟又做好心理準備，當然要捧。

（now635台、廣東體育周二凌晨4:00直播）
費Sir爭3冠提醒球員咪輕敵

曼聯喺聯賽拋離曼城12分，歐聯作客打和皇家馬德里後又晉級形勢大好，當然有足夠條件兼顧埋足總盃。事實上，最近費爵爺話曼聯99年成為3冠王，整體陣容其實唔夠依家咁強，當年去到歐聯決賽堅尼同史高斯停賽，中場更加連換人都唔敢，但家陣無論前中後3線都大把人用，鍾意點輪換變陣都得，易贏得多喎。

或者球迷會覺得，費爵爺狂讚依家嘅曼聯只係敷衍傳媒，但實情係，有數據顯示紅魔以1:1打和皇馬後，4大射手尹佩斯、朗尼、查維亞靴南迪斯同韋碧克已攜手攻入49球，比起99年約基、高爾、舒寧咸同蘇斯克查同時期攻入嘅55球，絕對唔輸蝕。既然費爵爺咁講，梗係唔可以喺足總盃失威，斷送再做「3冠王」嘅機會，所以佢都專登提醒班球員，今場唔好輕敵大意畀雷丁偷雞，睇怕紅魔班球員聽到都會加多兩錢肉緊，o趙多兩粒啦！
雷丁英超護級未必搏

相信大家仲記得，曼聯今季喺聯賽首循環作客雷丁，上半場未夠35分鐘已經炮製出4:3賽果，由於近期紅魔防線回穩，陣中又得中場史高斯同費查需要養傷，只要前線有正常發揮，贏兩粒開「讓球主勝」絕對唔難。再講，雷丁喺聯賽仲未脫離降班區域，試問邊有決心同閒情同曼聯過唔去？跟手佢哋仲要作客韋根搶分o架！
曼聯足總盃主場防守勁

‧曼聯近12次對雷丁得8勝4和。

‧紅魔近5次足總盃主場出戰僅失1球。

‧曼聯近19場足總盃取得15勝。

‧兩隊今季聯賽對陣，頭35分鐘出現7個入球。
紅魔搶攻博半場大

曼聯同雷丁聯賽首循環碰頭開波未夠35分鐘就有7個入波，雖然紅魔今晚唔會以最強陣出戰，但雷丁都要留力護級，為咗盡快解決對手，相信曼聯開波後會即刻搶攻，對住雷丁嘅豆腐後防，應該可以喺返更衣室前，入夠兩球開半場入球大，足智彩有1.95倍博得過。
英總賽制

今場為足總盃16強賽事，若90分鐘打和將擇日重賽，重賽再和先加時30分鐘，再和則互射12碼決勝。