多蒙特 法蘭克福爭做阿二「大」打出手

猪拉多纳

德甲今晚上演一場「歐聯級」嘅重頭大戰，由衞冕嘅多蒙特喺主場迎戰穩坐前4位置嘅法蘭克福，雖然「蜜蜂兵團」實力上略高一線，不過佢哋近期硬仗連場，王牌前鋒羅拔利雲度夫斯基仲要坐波監，令到今場贏面大減，須知法蘭克福亦唔係乜嘢善男信女，就算入球大細中位數開到3.5球，阿占照樣認為2.1倍「入球大」先係最正路選擇。

（有線61、64、201及204、中央5台周日凌晨1:30直播）
羅拔利雲度夫斯基停賽

多蒙特今季火力依然驚人，聯賽踢咗21輪入47球，只係僅次於拜仁慕尼黑，雖然波蘭射手羅拔利雲度夫斯基停賽，但佢哋仲有巴拉斯塞高斯基同馬高列奧斯等數胡高手，入球能力絕對唔成問題。之不過，「蜜蜂兵團」目前仍有好多問題，尤其係周中啱啱先飛到烏克蘭同薩克達踢咗場硬仗，舟車勞頓下狀態難免變得飄忽，加上喺德甲畀「一哥」拜仁慕尼黑大幅拋離，目標已經唔再放喺聯賽度。

另邊廂嘅法蘭克福，近6場德甲攞到4勝1和1負成績，美亞、拿傑同乾貴士嘅攻擊力絕對唔講得笑，尤其係佢哋依家唔單止要為保住前4位置而戰，進取啲甚至有機會搶埋多蒙特個「阿二」位置，今場作客一樣唔會死守博1分算數，預期佢哋會同多蒙特鬥攻，開「入球大」嘅機會自然大大增加啦！
頂占筍盤：多蒙特（入球大）