布力盤入球工器 玩轉兵工廠

猪拉多纳

足總盃第5圈 今晚11:00開戰

手掌係肉，手背係肥豬肉！今晚阿仙奴喺英格蘭足總盃第5圈出擊，主場迎戰布力般流浪，雖然雲格想結束8年錦標荒，不過下周中仲有場歐聯等緊佢，唔想錯過搵銀機會，「兵工廠」今晚點都唔會去盡，撞啱對家布力般有部入球機器佐敦洛迪斯壓陣，布力般受讓，3.85倍「讓客」抵捧！

（now635台及廣東體育周六晚11:00直播）

「兵工廠」自05年開始就同獎盃無緣，領隊雲格話冇壓力就呃你啦！本來贏足總盃當交差係理所當然，不過好衰唔衰，個賽期就唔多理想，如果搏得太盡，隨時影響下周二對拜仁場歐聯嘅戰績，賽前中堅梅迪薩卡叫隊友唔好諗歐聯，專心踢今鋪，你話得唔得先？想爭歐聯巨額獎金，雲格今鋪一定會用部分副選擔正，改用傷患多多嘅路斯基做指揮官，咁嘅環境，又點會有好成績吖。
阿仙奴3隻左閘唔出得

再講，雲格今晚想出強陣都恐怕有心無力，事關中場韋舒亞小腿受傷，應該唔會冒險落場，更大鑊嘅係華美倫同哥斯尼兩名中堅同時打柴，左閘位仲衰，贊堅臣停賽、基蘭基比斯傷埋，安德里山度士就借咗返甘美奧，冇得揀之下，「教授」今鋪應該會用西班牙小將恩格斯美基爾擔正，佢經驗不足好易出事。
洛迪斯士哥多過尹佩斯

布力般炒咗貝治之後，改由37歲嘅少帥艾柏列頓領軍。呢位前西布朗中場講求防守戰術，領軍7戰取得3勝3和1負，其中近4戰更只失1球12碼，表現討好。更令力奇放心嘅，係呢班波守得叻之餘仲要識入波，佢哋前線就有把蘇格蘭尖刀佐敦洛迪斯，佢喺上季入咗36球，係全英各級聯賽神射手，齋計數字仲勁過尹佩斯o架！家陣呢位23歲神箭近10戰又入咗9球，今季喺英冠已累積18個「士哥」，布力般有呢部入球機器壓陣，隨時贏埋「兵工廠」都仲得！
佐敦洛迪斯小資料

出生日期：1990年2月5日（23歲）

國籍：蘇格蘭*

身高：1米85

位置：前鋒

國家隊上陣次數/入球：6場/3球

現効力球會：布力般流浪

曾効力球會：葉士域治、牛津聯（借用）、羅奇代爾（借用）、巴拉福特（借用）、哈特斯菲爾德

*出生地為英格蘭，但因為細個跟隨喺蘇格蘭踢波搵食父親，留喺當地讀書，取得代表蘇格蘭資格。
布力般近4仗僅失1粒

‧阿仙奴近34仗足總盃主場戰不敗，得25勝9和。

‧歷來6次喺足總盃交手，阿仙奴有4次晉級。

‧布力般近4仗只失1球，唯1失球為12碼。
兵工廠輪換冇氣「細」

賽期頻密，阿仙奴今晚肯定會玩輪換，鋒力難免大幅下降，而且佢哋近2仗都只係小勝對手1:0，領隊雲格根本唔想用班波用得太盡，撞着布力般換帥後防守力「升呢」，今仗點睇都唔似入球騷，2.65倍「入球細」值博。