不來梅「大」騷獻新經理

猪拉多纳

舒哈夫黃金拍檔初上任

德甲球會雲達不來梅嘅領導體系同理念，同現時絕大多數球會唔同，唔似得史浩克04咁一年換兩三次教練，十分着重教練同球隊經理嘅長期合作，唔會太介意眼前成績，記得喺八、九十年代，「奧圖大帝」利赫高執教不來梅14年，一直同當年經理林基（Wille Lemke，現任球會執行委員會主席）合作無間，稱得上黃金拍檔，及後當然輪到現任教頭舒哈夫，佢同球隊上手經理K阿羅夫斯亦合作咗13年，呢間球會對職球員有情有義，所以特別多忠臣。
艾欣棄冰曲回歸足球圈

基於受到禾夫斯堡3倍高薪利誘，K阿羅夫斯決定唔做忠臣，喺去年底離開不來梅，雖然有多位不來梅名宿都被視為K阿羅夫斯嘅接班熱門人選，但最終佢哋出人意表咁請咗艾欣（Thomas Eichin）做經理，佢喺八、九十年代作為球員司職中堅，一直効力慕遜加柏，喺1999年退役，13年前加盟德國甲組冰上曲棍球球會科隆鯊魚做經理，雖然佢嘅傑出工作幫助球會取得相當驕人成績，但始終遠離足球圈已久，今次加盟不來梅，勝任自然惹人懷疑。不過，佢嚟到球隊之後雖然未正式上任，不來梅近期已取得兩連勝，起碼證明佢腳頭唔錯先。

今晚係艾欣擔任不來梅經理，同舒哈夫拍檔嘅第一場正式比賽，雲達不來梅喺主場迎戰弗賴堡（周六晚10時30分開賽），班球員當然會加多兩錢肉緊，希望畀到新經理良好印象，球隊近期狀態一流，幾名攻擊手阿拿奧杜域、尼斯彼德臣同肯特都當弗，連上季令人失望嘅天才中場伊基斯，上仗對史特加都終於爆發，令教頭舒哈夫有更多本錢踢佢堅持嘅進攻足球。
主場對弗賴堡例多波入

客軍弗賴堡近兩季有飛躍進步，教練施特拉希得到嘅評價甚至比舒哈夫更高，佢帶一班無名小將踢出悅目而富組織性嘅足球，計雙方目前人腳戰鬥力，弗賴堡作客都唔怕對手，不過要留意佢哋多年來作客不來梅成績極差，自2000年起8次到訪韋沙球場合共只攞過1分，不過8場比賽當中有7場開出大盤，包括上季不來梅贏5比3嘅入球騷，Oliver相信施特拉希嘅突擊戰術會對不來梅嘅脆弱防線構成莫大威脅，今場一於追大盤。
Oliver 推介：

雲達不來梅大 ★★★★

漢堡勝 ★★★★

漢諾威讓球勝 ★★★