文迪蘇傑復出撐拜仁

猪拉多纳

喺德甲帶甩幾條街嘅「一哥」拜仁慕尼黑，今晚喺聯賽獨腳戲作客中游分子禾夫斯堡，贏盡實力同氣勢，加上唔想喺下周中歐聯前有乜依郁影響士氣，可以肯定今仗絕對唔會留手。由前「狼王」文迪蘇傑倒戈帶領嘅鋒線唔難為拜仁省番幾粒大捷，我捧1.9倍「讓客」。

（有線64及204、廣東體育周六凌晨3:30直播）
兼顧歐聯前盡量搶分

拜仁喺今季德甲一枝獨秀勁到冇朋友，目前踢咗21輪取得54分，帶離次席多蒙特15分，雖然話形勢大好，但估計佢哋都怕夜長夢多，依家梗係要盡情搶分鎖定冠軍，以防之後去到歐聯關鍵階段，要兩邊兼顧分心。再者，佢哋喺歇冬後狀態勁爆，連贏4場聯賽喪入14球而未失1球，加上今仗提早到周五踢，賽後仲有充足時間備戰下周中歐聯對阿仙奴，今晚無後顧之憂，仲點會留手？

人腳方面，前線比沙路感冒無礙可以候命，但講到底，拜仁只要有文迪蘇傑壓陣就唔憂冇波入。呢位克羅地亞射手，上輪大炒史浩克04之戰獲准抖抖全場做後備，今晚勢必復任正選倒戈出擊。佢今季Fit到震，至今上陣18場聯賽入咗14球，踏入2013年就上陣3場入5球，就連德國國腳馬里奧高美斯都要做佢副車。至於防線亦有丹迪及時擺脫胃病上陣，以佢哋今季21戰失7球嘅恐怖防守力，就算中場有查維馬天尼斯養傷，但面對住火力平平嘅「狼堡」鋒線自然游刃有餘。
禾夫斯堡衰表現飄忽

主隊呢邊，新帥赫基自舊年12月上任以來，領軍4戰贏2場算係有交代，不過球隊演出始終略嫌飄忽，加上今仗對手係班霸拜仁，就算話有射手希美斯因膝部韌帶撕裂養傷半年後可以復出，兼有埋地利，睇怕一樣惡唔出樣，等做炮灰。