馬體會「讓球和」好路

猪拉多纳

今屆歐霸盃主場全部僅熟

歐霸盃32強今晚揭開戰幔，衞冕嘅馬德里體育會出名主場夠惡，卡達朗球場嘅5.5萬張波飛亦都晨早賣晒，食住歐霸盃主場12連勝加上逼到爆棚嘅氣勢，面對雪到僵晒嘅魯賓卡山當然可以秤先，但考慮到馬體會今季猛煲魚生粥，捧3.45倍「讓球和」似乎最好路。

（有線64及204周五凌晨4:05直播）

馬體會今季好叻仔，西甲戰線騎住同市宿敵皇馬，歐霸盃亦都輕鬆殺入32強，教練施蒙尼當然食過翻尋味，希望再次揚威歐洲賽舞台啦！睇番戰績，馬體會對上一次喺歐霸盃主場輸波，已經係2010年尾嘅事，之後就連贏12場，咁好路冇理由唔繼續信o架。
魯賓卡山歇冬後久疏戰陣

由於俄超家陣歇緊冬，作客兼有馬維拿首度披甲嘅魯賓卡山，已經有成兩個月冇正式比賽，呢排都係靠友賽保持狀態，近仗對住布加勒斯特迅速、克盧日同迪尼普呢啲歐洲三線球隊都輸晒，近況真係好一般。

考慮到馬體會有鋒將迪亞高哥斯達停賽，今季歐霸盃3次主場出擊分別僅勝柏辛域陀尼亞、科英布拉大學同特拉維夫夏普爾1粒，首回合對住先求穩守嘅魯賓卡山似係小勝格。