慕遜加柏拉素好「細」界

猪拉多纳

另一場歐霸盃32強深夜場，德甲慕遜加柏主場對意甲拉素，慕遜加柏幾日之前與利華古遜鬥足90分鐘，球員體力嚴重消耗，尤其係攻擊線方面，預料對入球能力必造成影響。至於客隊拉素，前鋒高路斯受傷唔出得，攻力肯定打大折扣，預料今場入球唔多，細盤捧得過。

（周五4:05am 有線63及203台直播）
拉素高路斯倦勤

慕遜加柏近三場總入球都超過2粒，純睇近績就唔係咁利開細盤。不過要留意係開大三場都係德甲，性質與歐霸盃完全唔同。特別係兩回合制淘汰賽，好多球隊喺首回合都會以穩陣為先，以免太早失守打亂部署，所以唔排除慕遜加柏今晚會以守為攻，盡量收窄拉素進攻空間。

其實拉素都好想喺歐霸盃有所突破，無奈德國老槍高路斯仲要休養大約1個月先至可以復出，呢點對於拉素爭取入球會構成一定影響。另外進攻中場靴蘭尼斯早前喺賽事中與對手「頭撼頭」，之後仲要送往醫院進行詳細檢查，呢次意外受傷令靴蘭尼斯留下陰影，比賽時總係避重就輕，侵略性亦明顯減弱。拉素進攻主力受傷患困擾，今場唔容易攻破主隊大門。