鳳凰防線大執位頂唔住水手

猪拉多纳

今午澳職獨腳戲由「一哥」中岸水手主場迎戰弱旅威靈頓鳳凰，撞啱今場鳳凰大鬧兵荒，攻守兩線各有主力缺陣，殘陣出擊睇怕難逃一敗。水手今季主場戰績勁爆，今場我捧2.1倍「讓主」！

（有線64及204周四下午4:00直播）

目前排第9位嘅鳳凰，雖然話近況有多少起色，近2場取得1勝1和，但最大鑊係今仗有3大防線主力齊齊缺陣，正選中堅薛蒙特停賽，右閘貝圖斯鼠蹊養傷，左閘洛治希特則因病上陣成疑，要一口氣大執位，實力減弱兼默契差，點會信得過吖！更雪上加霜嘅係，今季入咗11球嘅首席前鋒布洛奇因為老婆生仔，周一未有隨隊出征，踢唔踢得都好難講。不過就算畀佢搞得掂家事趕及落場，隨時又會心掛掛影響發揮啦！
踢亞冠盃前盡量搶分

水手呢邊，今季喺佢哋個藍舌中岸主場踢咗8場聯賽得7勝1和，主場戰績真係勁爆燈。冇錯，佢哋近4戰有3場和波，狀態係有多少回落，不過今仗對手只係今季作客9戰得5分嘅鳳凰，相信仍夠殺有餘。賽前水手教練阿洛特已經落「柯打」要贏波，事關佢哋未來3個月將要雙線發展，既要踢澳職，又要兼顧亞冠盃，唔想有閃失，趁依家亞冠盃未開波，梗係要盡量搶分兼重新谷起狀態。有鬥志，加上中場主力尼基蒙哥馬利波監刑滿復出，要大勝一場又有幾難？