沙特鬥中國和氣生財

猪拉多纳

2015亞洲盃外圍賽C組首輪賽事今晚展開，沙特阿拉伯喺主場迎戰中國一戰，原來係一場西班牙「內訌」，事關雙方主帥盧比斯卡路同甘馬曹都係前皇馬教練。兩班波近況同樣麻麻，想贏波都有心無力，最緊要係兩位主帥始終有多少淵源，大家既唔衰得，又未必想對方飯碗不保，咪話力奇小人之心，今場和波自然皆大歡喜，3倍和波抵博o架。

（中央5台周四凌晨1:15直播）

雖然話每組首兩名都可以出線，不過同組有隊硬嘢伊拉克，今晚沙特撞中國邊隊輸波，爭出線都會落入下風。最慘佢哋兩班波之前喺2014世界盃已經玩完，今鋪再輸，兩位領隊隨時又會食無情雞，唔想加入失業大軍，盧比斯卡路同甘馬曹齊齊玩保守踢法都唔出奇，反正大家和氣生財你好我好，梗係留番之後再搏好過啦！
盧比斯卡路首度領軍

再者，沙特喺上月海灣盃出局後，先改由盧比斯卡路改代被炒嘅列卡特領軍，對班波唔熟，又點可以令呢支褪色勁旅翻身吖？就算話重召効力伊蒂哈德嘅「恒大剋星」夏沙斯孭飛，仍然都係信唔過o架。至於中國上月拉隊去西班牙集訓19日，上星期返到嚟亞洲同殘陣嘅阿曼拍跳，居然都要輸0:1，狀態未見起色，今晚仲話有中堅馮瀟霆傷埋唔踢得，作客波點睇都係求和格啦！

亞洲盃C組
亞洲盃外圍賽賽制

20支球隊分5組進行小組雙循環賽，每組首、次名，以及5隊之中的最佳第3名躋身2015年決賽周。

分組形勢：

A組（約旦、阿曼、新加坡、敍利亞）；

B組（科威特、伊朗、泰國、黎巴嫩）；

C組（中國、印尼、沙特阿拉伯、伊拉克）；

D組（巴林、卡塔爾、馬來西亞、也門）；

E組（阿聯酋、烏茲別克、 越南、香港）

已躋身決賽周球隊：

澳洲（主辦國）、日本、南韓、北韓