法國齊心唔怕「Hea王」德國

猪拉多纳

今晚國際賽擔大旗，除咗巴西造訪英格蘭，法國主場火併德國亦係焦點。法國由新帥迪甘斯領軍，班人要保住國家隊位置肯定齊心搏命，撞啱對家德國玩熱身賽例Hea踢，「高盧雞」要保住不敗唔難，1.47倍「讓球主勝」放心捧。

（now714台及中央5台周四凌晨4:00直播）
搏命討迪甘斯歡心

熱身賽嘅意義，其實係畀國家隊領隊近距離了解吓班人，再制訂陣容同戰術，不過好似德國勒夫咁帶咗日耳曼軍6年，成隊波又後生，基本陣容唔會有大轉變，班國腳自然唔使搏命整傷自己，最重要係德國佬不嬲唔到重要關頭都唔出真功夫，上次熱身賽咪同荷蘭整個「窿窿」跣捧場客囉，近8場友賽，德國只亦係取得2勝，今晚學咩人讓波？

相反迪甘斯上任無耐，一眾法國國腳都要博領隊歡心，好似上仗對意大利咁，成班法國兵好似癲咗咁狂谷，最終如願反勝，一啲都冇話錫身！雖然法國足總縮短馬維拿嘅國家隊禁賽期，但佢依然要同麻煩友拿斯尼及賓艾化服刑，更衣室氣氛冇受影響，今晚就算贏埋德國都唔奇。