意國「+1」射爆荷蘭

猪拉多纳

巴神小法老王合力數胡

國際賽好波連場，荷蘭主場對意大利亦好有睇頭，意軍射手巴洛迪利啱啱加盟AC米蘭即有佳作，佢同拍檔艾沙拉維合作絲絲入扣，被喻為意國未來十年夢幻鋒線組合，今晚再攜手出擊，令人期待。反觀荷蘭派二線兵出擊，領隊尹戈爾旨在考察一班小將及邊緣國腳表現，試陣味濃，今仗讓唔起意大利，Mic少要「讓球客勝」。

（now 632周四凌晨3時30分直播）

意大利近年以祖記為班底，但依家已被AC兵團搶晒風頭，巴洛迪利轉投AC後，迅速同另一位天才新星「小法老王」艾沙拉維擦出火花，夾手夾腳創造AC上仗兩個入球。事實上，領隊柏蘭迪利非常睇好呢兩位90後前鋒，上次國際熱身賽已安排佢哋正選鬥法國，表現備受好評。配合蒙杜利禾從後支援，淨係呢個AC進攻鐵三角，已經夠照。而且唔好忘記中場球星派路、迪羅斯、巴沙利及保方等主力都有入選，集創造力、活力及經驗於一身，等閒之輩好難擊敗呢班「藍血人」。
荷軍小將志在練兵

另一邊廂，尹戈爾上年7月重掌荷蘭帥印後，仍然建造緊新班底，今次大軍名單只有尹佩斯、古積特、亨特拉爾及馬菲臣係常規國腳，其餘大部分都係廿歲出頭嘅小將，國際賽上次數少於10次，計經驗都輸晒。尹戈爾明顯想藉今次機會，培訓第二梯隊，從中吸納新血，所以唔會太重視今場勝負，仲要讓波當然捧意大利「讓球客勝」。