射手回巢錫菲聯發茅

猪拉多纳

兜兜轉轉，撈極唔起嘅修咸頓前鋒科迪終於「返屋企」，最近以借用形式回巢母會錫菲聯，呢位射手寧願落英甲都唔想坐冷板，為嘅係證明畀人睇佢仲掂、仲有火！錫菲聯為保住直接升班希望，今晚鬥卡維尼不容再失，鬥心旺盛冇理由唔撐1.85倍主勝！

（開賽時間：周三凌晨3:45）
卡維尼大換血磨合需時

現年26歲嘅科迪出道初期光芒四射，又做過英格蘭小國腳，奈何兩年前去到修咸頓之後坐多過踢，今次主動要求返錫菲聯，首要任務就係幫母會爭升班，有佢同傑臣合組雙箭頭，喺英甲夠照啦！錫菲聯上仗臨尾香以1:2輸畀高雲地利，領隊威爾遜不知幾嬲，今仗下令鬥卡維尼殺無赦，況且佢哋暫時落後次席嘅唐卡士打8分，想爭直接升班真係要急起直追嘞。

今仗對手卡維尼入座率偏低，前日宣布免費畀18歲以下球迷入場，睇晒今季餘下嘅5場周六賽事，希望踢班小球迷入會。查實要冧掂Fans，戰績係最緊要，佢哋近14場聯賽有11場失分，日前仲一口氣簽入5位生力軍，邊有咁快磨合到吖？造訪來勢洶洶嘅錫菲聯想唔輸都難！