漢堡法蘭克福鬥數胡

猪拉多纳

唔知大家有無留意到德甲比賽開波前，當地攝影師好多時都會近距離影吓觀眾席，多數以靚女做頭號目標，另外就係亞洲球迷。靚女出鏡當然明白夠養眼，但亞洲球迷點解會係攝影師杯茶？因為近年德甲漸漸成為班亞洲球員大放異彩嘅場地嘛！今晚漢堡主場對法蘭克福，就有孫弘民與乾貴士大鬥法，唔使問一定有班亞洲粉絲捧場啦！

（有線61及64台周日凌晨1時30分直播）

呢場馬會開漢堡小讓平半，的確漢堡近九場主場贏六場，係有啲主場威力嘅。不過，近日漢堡後防出現好大問題，文切尼受傷，轉用謝菲布馬做韋斯達文拍檔，上場對雲達不來梅就出晒事喇！今晚面對嘅對手係踢高空波唔錯嘅法蘭克福，睇嚟漢堡想保住不失有啲難度。魯迪尼夫斯同孫弘民預計繼續有正選，勝負關鍵在於佢哋能否入多幾球去彌補番失球，不過我就覺得呢對前鋒冇乜料到！
高佬美亞轟炸攞着數

法蘭克福嘅殺人武器就係有一米九六高度嘅美亞，佢都算能頂善射，暫時以十二個入球成為陣中神射手，佢高過對方後衞謝菲布馬成10厘米，今晚一定賺到甜頭。不過，呢隊波作客同防守都好有問題，之前只係對賀芬咸同禾夫斯堡保住不失，所以我今場唔打算估邊隊贏。今晚買入球大最着數，首循環法蘭克福主場贏三比二，有往績支持，相信今場入球唔會點少囉！

Wendy推介：大