禾堡大把貨主場博反彈

猪拉多纳

Macot經常同熟悉德甲戰友Oliver、Alwin及黑柴交換心得，我哋一致認為禾夫斯堡係德甲下半季嘅銀行球隊，戰術係實幹型新帥赫基嘅強項，佢有足夠能力融合呢支擁有質素同充足兵源嘅球隊重返勁旅行列，目前排第13位只係過渡性質，估計聯賽排名會一路攀升，來季甚有機會出席歐洲賽事，禾堡今晚主場面對弱旅奧格斯堡勝望甚濃，只因為佢哋近期成績較反覆而受莊家低估，今仗主Ｗ有1.68倍已相當超值。

（周六晚10時30分開賽）

禾夫斯堡歇冬後首仗即喺主場以2比0輕取史特加，上仗作客面對漢諾威輸1比2，賽果係令人失望，不過計表現其實絕對唔曳，只係因為腳風唔順同欠運，至錯失多次入球良機，一分都攞唔到係有啲唔抵，不過今仗重返主場又唔同睇法，球隊無論質素同兵源都遠勝客軍，輸完之後打醒精神，今晚戰意值得信賴。
奧格斯堡焗攻不利

奧格斯堡近期亦做得好，近3場聯賽連接成功搶分，但唯一勝仗只係靠同級對手杜塞爾多夫不斷送禮，上仗主場悶和史浩克只因對手陷入低潮，球賽水準甚低，球隊攻力同整體實力喺德甲都注定係雞尾班，目前排尾三距離護級安全線仲有8分之遙，未來比賽場場都要主動搶攻，但作客面對質高一皮兼反擊犀利嘅禾堡，搶攻只會令防線露出更多空位，搶分機會絕不樂觀。
Macot推介：

禾夫斯堡勝 ★★★★

卡迪夫城上盤 ★★★

阿爾克馬爾讓球勝 ★★★
Macot

綽號：醫生

國籍：斯洛文尼亞

42歲，對多個歐洲聯賽都有研究，廿多年前已開始在足球菠菜公司工作，從最初的輸入賽績，做數據開始，到近年負責專業分析，三年前更辭去工作，創業推出betdoctor.net收費足球資訊網，擅於把握莊家開錯盤而幫助顧客獲利。