射手好番哂祖記圍攻拉素

猪拉多纳

意大利盃4強次回合今晚上演，拉素主場再遇祖雲達斯，受讓平半都冇着數。現時拉素有王牌前鋒高路斯未好番，相反祖記食胡射手就相繼復出，門神隊長保方又答應續約兩年，當然唔會錯過入決賽機會，上盤抵捧。

（now633及660台周三凌晨3:45直播）

首回合踢成1:1，拉素有作客入球喺手，意味祖記要爭取入波晉級，至少唔會踢得太被動。對於剛啱喺聯賽主場以0:1不敵基爾禾，連續16場不敗斷纜嘅拉素嚟講，最不利係洛基被送到國米，高路斯又未康復，前線選擇唔多，更慘係今季弗到漏嘅中場靴蘭尼斯，最近放風想離隊，諗住跳槽加人工，睇怕會進一步打擊拉素士氣。
保方續約祖記到2015

對家祖雲達斯近6場得1勝4和1負，翼鋒卡華禾艾沙姆踢緊非國盃，大腦派路又養緊傷，本來氣勢麻麻，但好消息係日前祖記喺聯賽以1:1打和熱拿亞，加利亞雷拉同基奧雲高同時傷愈復出，可以畀射手胡仙歷抖吓，當中加利亞雷拉更喺上仗先開紀錄，隨時又發威。仲有呀，祖記領袖保方已答應續約至2015年，嚟緊肯定希望捧多啲盃至退休。