拉素祖記愛鬥「大」

猪拉多纳

意大利盃四強次回合輪到拉素主場對祖雲達斯。首回合兩隊打和一比一，拉素有一個作客入球在手。雖然話拉素有些微優勢，但總唔代表首都球隊會打守勢波，尤其喺奧林匹高球場作賽，拉素更加會利用主場優勢進逼對手。同樣地，祖雲達斯為求躋身決賽一定要贏波或以較大比數和局，故此今場雙方都大踢進攻足球，大盤可留意。

（now 633及660周三凌晨3時45分直播）

拉素與祖記近況都麻麻，雙方都喺周日聯賽失分。不過球迷唔使太在意，事關盃賽性質唔同，加上今場賽果關乎晉級，相信兩隊都會打出預期水準。
爭入決賽祖記焗攻

以拉素為例，佢哋攻力唔差，就算高路斯未必可以復出，但幾位攻擊中場都好有入球能力，要撕破祖記防線冇難度。尤其今場客隊缺少後防重心基亞連尼，拉素爭取入球就更輕鬆。

祖記今場冇入球就一定出局，故搶攻目標好明確。其實祖記自歇冬後只贏過一場，所以今場好希望作客擊敗拉素，盡快紓緩內外壓力。唔敢寫包單話祖記必勝拉素，但佢哋戰意肯定冇問題，一定搏到盡爭取更多入球，預計今仗戰情會相當互動，任何一方入球後都會激發起對方反撲，大盤係唔錯嘅選擇。