修咸頓「+1」奪愛

猪拉多纳

普捷天奴掌帥頭炮打穩陣牌

英超「聖人」修咸頓正式進入後艾堅斯時代，新帥普捷天奴接替艾堅斯領軍首仗喺主場對愛華頓，普帥喺柴台聲中上台，唔敢咁快進行大改革，「聖人」喺上手教頭調教下漸入佳境，用番之前套打法夠砌，主場受讓着數，博「讓球主勝」。

（有線300及200台周二凌晨4時直播）

修咸頓用咗半季適應英超，對上五場聯賽不敗，硬撼阿仙奴同車路士都唔使輸，踢落非常對辦。佢哋季初後防中門大開，但依家總算做到攻守兼備，可見艾堅斯真係花咗唔少心機。「聖人」愈踢愈好，會方卻突然請艾堅斯食無情雞，班粉絲梗係詐型啦，有球迷組織呼籲自己友今仗高舉白手巾向球會抗議，齊齊用行動向管理層反映不滿。

普捷天奴領軍首戰得到自己班球迷「特別招呼」，確係有啲尷尬，但最緊要係整靚張成績表向球會交代。修咸頓有唔少球員同艾堅斯一齊打江山，呢班戰將有機會成為反動力量，普帥當務之急係安撫佢哋嘅情緒，啱啱接手唔會大執，料會繼續重用射手列基林拔，大軍主要傷兵得守將荷西方迪，人腳完整，踢番鬥車仔同阿仙奴水準，唔赦對手！
愛華頓客勝率不足4成

愛華頓教頭莫耶斯對於艾堅斯被炒感意外，仲戥佢唔抵，相比之下，莫帥深得球會信任，大權在握，幫到班波穩定發展。「拖肥糖」保持一貫穩定發揮，謝拉域、費蘭尼及巴尼斯等主力都有分量，但作客始終唔係佢哋強項，今季聯賽作客勝出率不足四成，經過客場三連勝後，隨時獲利回吐，遇上踢起信心嘅修咸頓唔易打，讓波絕對唔抵玩。