藍黑兵團唔驚廢狼

猪拉多纳

休息咗一排終於又再次同大家見面，近排小妹投身社會做事，發覺原來做嘢同讀書真係兩回事。初初以為入咗大公司做事就有保障，條路會比人容易行，但原來唔係想像中咁易。公司愈係規模大，人事方面就愈複雜，最慘係人工唔係高，嘢又唔易做，依家先明白咩叫「搵食艱難」！

不過，其實除咗小妹，「搵食艱難」嘅仲有國米教練施特拉馬斯安尼。話說國米自從莫連奴喺2010年離開之後，成績每況愈下，完全無哂當年三冠王嘅風範，近況仲認真麻麻添。雖然係咁，今晚國米作客羅馬，小妹都決定捧「藍黑兵團」「讓球客勝」，希望佢哋打番場好波攞到分。
羅馬歇完冬死晒火

睇番目前聯賽形勢，羅馬同國米分列第6同第4，前者落後6分。雖則話近期羅馬主場已經5連勝，但要注意「雌狼」羅馬自歇冬後，表現完全走晒樣，除咗2場意甲作客都輸波收場，就算意大利盃都只係喺法定時間悶和費倫天拿，要靠加時先過到關，最醜怪係如果只計算法定時間，3場夾埋更只入得1粒，表現認真「廢廢哋」。

當然，國米都唔好得去邊，近5場作客居然全部輸晒。不過小妹發現，「藍黑兵團」今季作客強隊往往都打高幾皮波，除咗掛名「作客」贏AC，最經典當然係造訪祖雲達斯贏3:1。再者，國米個中場大腦古亞連同前鋒柏拉斯奧，近2場就分別攻入2球，腳風幾順，有佢哋壓陣，容乜易又射爆羅馬。左計右計，小妹都認為國米今鋪唔會咁易輸，受讓捧1.85倍「讓球客勝」應該夠晒穩陣啦！
推介：國際米蘭（讓球客勝）

微博傳情：有冇攝太歲妙法呀？

仲有唔夠1個月就踏入「蛇年」啦，有人話小妹出年犯太歲喎，雖然我一向都唔多信呢啲嘢，不過求個心安，如果各位有咩唔多使錢又簡單嘅攝太歲方法，記得通知我啦！而上星期小妹所屬鏢隊終於完成今季比賽，表現其實仲有進步空間，點都好，下季我哋一定會繼續努力，再創佳績嘅！Yeah！