熱刺銅牆頂住紅魔

猪拉多纳

門神上晒身夠穩陣

曼聯今季簽咗個好前鋒尹佩斯，成為佢哋爭標最重要棋子，其實熱刺季前簽咗個好龍門洛里斯，亦好可能會係球隊實現殺入前4嘅關鍵！自從洛里斯擔正熱刺正選門將位後，球隊防守力大大提升，今晚主場迎戰火力強勁嘅曼聯都冇有怕，熱刺喺白鹿徑球場一向夠惡，今場好大機會搶到分，平手盤抵玩！

（有線200及300、廣東體育周一凌晨0:00直播）
曼聯防線缺少維迪擇使

熱刺季前高價收購法國國家隊首席門將洛里斯，點知保亞斯就安排佢做費度後備，睇到球迷一頭霧水，不過自從上年11月坐穩正選後愈踢愈好，近8場英超有5場保持不失，連保亞斯賽前都承認自己季初決定錯誤：「佢係法國最佳門將，我咁做的確令佢覺得不安同失去耐性。」

唔好忘記，熱刺聯賽近5仗主場出戰有4勝1和，雖然艾迪巴約要暫時離隊去踢非洲國家盃，但迪科爾狀態依然勇猛，丹普西客串前鋒亦表現唔錯，而且熱刺真正嘅進攻核心係兩翼加里夫巴利同艾朗連儂，今季曼聯首敗就係由熱刺「送贈」，呢班生牯仔自然信心十足。

相反，曼聯門將迪基亞就非常「神經刀」，論身手佢係好敏捷，不過判斷力同出迎都經常甩漏，速度極高嘅英超似乎唔多啱佢，而且曼聯今場仲有尼曼查維迪受傷，防線實力進一步削弱。加上紅魔呢排連踢多場硬仗後，今仗難免會有疲態，失分絕對唔出奇。
熱刺主場易入波

‧尹佩斯近9場聯賽入9球。

‧熱刺近7場不敗兼只失2球。

‧熱刺近8場主場只有1場無入波。
兩隊鬥攻「大」殺四方

曼聯今仗有剛復出嘅朗尼夥拍射手尹佩斯，火力有保證。不過里奧費迪南同艾拉一眾後防老化，好難抵擋快翼艾朗連儂、加里夫巴利同前鋒迪科爾等人嘅衝擊。加上兩隊打法同樣以攻為守，雙方今季聯賽超過三分二比賽開大，睇怕今場都唔會例外，1.57倍「大」穩陣。
頂占筍盤：熱刺（平手）