硬淨巴亞戰車 橫掃豆腐工廠

猪拉多纳

今晚英超「倫敦打吡」由車路士主場對阿仙奴，「兵工廠」係今季英超攞最少黃牌嘅球隊，好睇唔好食，係「小兵」近年陷低潮嘅主要原因，都係捧硬淨到爆嘅車仔着數啲，主W有1.72倍，抵玩！

（有線200、300及廣東體育周日晚9:30直播）

雲格時代最強盛嘅阿仙奴係踢442陣式，中場黃金拍檔比堤同韋拉攻守兼備，加上四大長老喺後防看門口，硬淨到得人驚。可惜，近年雲格轉性迷上「巴塞式足球」，盲目控球在腳，以往韋拉係英超殺人王，個人72黃8紅紀錄至今無人能破，自從佢離隊後，「兵工廠」就開始迷失甚至墮落。
阿仙奴攞牌英超最少

睇番紀錄，今季阿仙奴喺聯賽得19黃2紅，相比最茅嘅史篤城嘅45黃3紅，簡直係存在喺唔同世界，就算車仔嘅28黃2紅都比「兵工廠」硬淨得多。係，禾確特終於肯以10萬鎊周薪續約阿仙奴，係會令士氣提升，亦冇人話踢得茅就一定掂，但依家嘅阿仙奴玩控波，中場真係好緊要，家陣佢哋冇養緊傷嘅阿迪達，單靠柔弱嘅辛迪卡索拉同戴亞比，真係好容易被人撳住砌，想好似上季咁作客贏5:3，好難囉。
丹巴巴亞專恰兵工廠

雖然車仔有前鋒域陀摩西斯同中場約翰米基爾去咗踢非國盃，但新加盟嘅射手丹巴巴亞轉會後3次打正選入3球，期間帶挈車仔取得11球進帳，證明佢嘅侵略性比費蘭度托利斯高得多，能夠帶動同撻着隊友，更何況丹巴巴亞上個月為紐卡素出戰「兵工廠」，曾經梅開二度，呢場再入波絕對唔出奇。
阿仙奴換邊前少領先

‧近4次對賽有3次開入球大。

‧車路士連續4場開入球雙。

‧阿仙奴近6戰5次半場打和。

‧兵工廠今季9次喺最後10分鐘入波，為英超最多。
車仔復仇博第1隊入球

現時阿仙奴嘅致命傷係防線不穩，佢哋近4場比賽就有3次先落後，雖然兵工廠有中堅哥斯尼坐完波監復出，但中場攔截力不足係佢哋嘅致命傷，撞啱車路士上季喺主場對賽以3:5慘敗，今場肯定復仇心切，有條件先入波，開1.54倍「第一隊入球」。