倫敦打吡「大」哂冷

猪拉多纳

車仔阿仙奴爭勝息民憤

英超大戰雙響炮，頭場先有倫敦打吡戰，車路士主場惡鬥阿仙奴，兩軍正處於困難時期，車仔近七場聯賽主場僅一勝，追平1995年羞家紀錄，令主帥賓尼迪斯民望跌至新低。「兵工廠」本季錄得教頭雲格任內同期最曳戰績，同樣民怨沸騰。大戰當前大家都唔衰得，正宗鬥攻格，主隊有丹巴巴亞，客軍有禾確特，兩個射手都弗鬥數胡，蘇豪一於捧大！

(有線300及200台周日晚9時30分直播)

車路士上周中對修咸頓斷送領先兩球大好形勢又失兩分，似有托大之嫌，睇住佢哋喺近七次聯賽主場僅一勝，車迷唔嬲就假啦！喺賓尼迪斯帶領下，車仔水準飄忽，對上五戰二勝一和二負，根據攤路今場贏得，但班波忽龍忽蟲，點信得過吖！大軍今戰續有尼日利亞雙星約翰米基爾及域陀摩西斯出戰非國盃缺陣，其餘主力都可披甲，前線「新魔獸」丹巴巴亞加盟後四戰入三粒，喺前線衝得撞得，甚有杜奧巴feel，睇怕王子費蘭度托利斯都要繼續坐冷板。
巴亞禾確特尖鋒對鬥

另一邊廂阿仙奴聯賽戰績非常唔掂，屬雲格上任後同期最曳成績，若果再唔爭氣，恐怕難入前四。兵工廠啱啱落實同王牌前鋒禾確特續約，軍心稍定，大軍上周中於足總盃再戰史雲斯踢出今季其中一場代表作，換邊後以壓倒性姿態壓住對手狂攻，推進快速兼具侵略性，埋門又到肉，最終憑中場韋舒亞尾段一腳射死對手，目前兵工廠士氣高漲，乘勇再戰唔會縮埋死守。阿仙奴主要傷兵只得中場阿迪達，另有箭頭謝雲奴出戰非國盃，都算齊腳喇！

兩隊上季喺史丹福橋球場合演瘋狂入球騷，阿仙奴最後以五比三炒「車」，過程刺激到不得了，雙方同樣擁有驚人攻力，若然今仗早段出現入波，睇怕會一發不可收拾，勝負難料，玩大最穩！