阿德壯志「雄心」

猪拉多纳

澳職殺入大直路，阿德萊德聯只係追到落後榜首嘅中岸水手兩分，教練高斯米拿日前話唔希望水手有主力離隊，咁阿德萊德聯最後封王先夠說服力喎！沙塵成咁，似乎對聯賽冠軍胸有成竹，今日造訪「有前冇後」嘅雄心，一於捧2.5倍客W！

（有線64及204周五下午4:30直播）

澳職轉會窗本周重開，高斯米拿向阿德萊德報章《NOW》話：「我知水手好多球員都獲垂青，最緊要佢哋嘅球星繼續留隊，咁我哋後來居上先夠威o架嘛！」查實又抵高斯米拿咁沙塵嘅，阿德萊德聯今季重新起飛，鋒力更加係同勝利一樣冠絕聯盟，難怪佢老人家連澳職史上第3多產嘅射手沙治奧雲迪克都夠膽唔用，最近仲決定同佢解約啦！

主隊雄心有後衞大衞威廉刑滿復出，中場古魯斯奧又克服足踝傷患可以候命，人腳其實幾齊整，不過亨格比利始終嫌教練艾萊斯未夠火候！呢位澳洲殿堂級射手上年先坐正，執教經驗真係冇乜，就好似近6場波咁吖，當中佢哋輸咗4場，呢4場嘅共通點都係下半場走晒樣，半場明明Lead住或者和緊，但換邊後就跌晒Watt，「有前冇後」問題都幾嚴重，想擋住「阿德」睇怕唔易。