為「仁」師表審慎妥協

猪拉多纳

哥迪奧拿以世界第一身價教頭身份空降慕尼黑，令全德國甚至全歐洲都引頸以待，黑柴肯定拜仁係佢嘅理想選擇，但呢位少帥想喺慕尼黑複製「巴塞王朝」，首要做好審慎同妥協嘅心理準備。
性格低調啱高層嘴形

拜仁無論人腳同財力，已經係歐洲甚至世界頂級，除巴塞外，計實力根本無懼任何強敵，但拜仁係一支充滿荷里活色彩嘅球隊，作為教練，除非一上任就攞到各方滿意嘅好開始，否則就會面臨數之不盡嘅干擾同壓力，唯一樂觀嘅係一向意見多多嘅拜仁高層對今次搵哥迪奧拿意見一致，相信會給予較多耐性，哥帥本身沉穩而內斂嘅性格，亦啱晒拜仁一班「大嘴」高層嘅口味。

不過，拜仁球員控球能力雖然唔差，但進攻體系同巴塞始終截然不同，一向倚重翼鋒列貝利、洛賓甚至梳頓沙基利嘅邊路個人突破，若然哥帥照搬巴塞嘅戰術，肯定會限制咗球隊一貫嘅最強項，尤其鍾愛獨食嘅洛賓，隨時會成為犧牲者。

而且哥帥過去只教過巴塞，上季佢畀質素次一皮嘅皇馬壓住，應變能力同經驗都輸畀莫連奴，睇埋今季巴塞嘅表現同成績，佢甚至連維蘭路華都不如，功力是否已達世界頂級尚待考驗。
徹底「巴塞化」未必可行

嚟到人生路不熟嘅慕尼黑，德文仲係啱啱至惡補，臨場調動隨時會遇上問題，奉勸佢執教初期唔應該對球隊陣容同踢法作太大改動，為球隊滲入巴塞精華需要一步步嚟，同時亦要保留拜仁特色，硬要將拜仁徹底「巴塞化」未必可行。