馬體會主場無「迪」搶西盃

猪拉多纳

西班牙盃最後一場8強首回合賽事聽朝進行，由馬德里體育會喺主場迎戰貝迪斯。馬體會今季主場仲惡過巴塞，15戰全勝，加上射手法卡奧重拾射門鞋，1.91倍「讓主」絕對抵玩。

（開賽時間︰周五清晨5:00）
15戰全勝 768分鐘不失球

馬體會今季表現大躍進，暫時喺聯賽仲以7分之差，力壓同巿大哥皇家馬德里排第2，成班球員信心大增！雖然話馬體會要追趕巴塞角逐西甲，又似乎係不可能嘅任務，但睇落又冇邊隊可後上搶走佢哋張下屆歐聯入場券，絕對有權分心爭吓盃賽！再者馬體會所屬戰區有利，嚟緊晉級之路完全避開巴塞同皇馬，極大機會殺入決賽，爭逐久違了16年嘅西盃冠軍。

事實上，馬體會今季喺卡達朗主場表現勁惡，15戰全勝之餘，踏入11月開始已保持768分鐘不失球紀錄，呢8場比賽更攻入20球，場均多過2球，認真威水。加上「入球機器」法卡奧上仗又打破近1個月嘅入球荒，相信嚟緊入波應陸續有來！
貝迪斯中前場多人缺陣

另邊廂嘅貝迪斯今年表現都唔差暫列第4，不過同第8位球隊只係相差4分，睇怕佢哋肯定會專注聯賽多啲，以保住下屆歐聯參賽席位。最慘係佢哋今場有中場伊基保要出戰非國盃缺陣，而前鋒阿歷士馬天尼斯、普素路、中場魯賓佩雷斯同桑卡路士佩雷斯又續抖，陣容欠完整，作客馬體會睇怕難逃一敗。