巴塞盃仔都貪 「-2」照撐

猪拉多纳

西班牙盃8強首回合重頭戲今晚上演，巴塞隆拿喺主場招呼馬拉加，「-2」都要追2倍「讓球主勝」。現時巴塞喺聯賽放甩皇馬18分，踢西班牙盃唔需要過度留力，可望繼日前聯賽交手贏波後再添食。（now632台周四凌晨4:30直播）

相信冇人估到，維蘭路華接手統領「地上最強」，戰績竟然比哥迪奧拿時代更強勁，目前以18分拋離皇馬，基本上唔需要專登留力，何況新球王美斯今晚賽前仲要向Fans展示金球獎，肯定會show quali。再講，近期巴塞嘅傷兵問題已好轉，連阿歷斯山齊士都能夠喺上一圈打沉科爾多瓦嘅聯賽梅開二度。
剛戰作客都贏馬拉加3:1

雖然韋拿最近又話大髀有傷，今場波都唔使預佢，不過巴塞嘅士氣冇得彈，對上5場更加每場攻至少攻入3球，即使教練維蘭路華曾經因為治療癌病休息，超強氣勢始終冇被打斷，何況美斯今年再拎國際足協金球獎，目標肯定唔止拎聯賽冠軍咁簡單，而且只要打低馬拉加，4強就好有可能遇到皇馬，相信會激勵巴塞球員加多兩錢肉緊。
比歷連尼最忌巴塞

另一方面，馬拉加教練比歷連尼由執教皇馬開始，對住巴塞都係完全冇運行，對上7次領軍對賽輸清光，期間有6場至少淨輸兩球，包括3日前喺聯賽碰頭主場輸1:3，證明佢嘅戰術同打法，根本威脅唔到巴塞，就算佢唔瞓覺諗橋，都唔會有辦法對付美斯，加上馬拉加嘅射手辛達告魯斯同沙維奧拿撻唔着，呢場首回合仲要作客，好易被炒起。

賽制：採主客兩回合淘汰制，今輪為8強首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊憑作客入球優惠晉級，若加時沒有入球，則需互射12碼決勝。