國米老人鋒線夠殺博洛

猪拉多纳

聯賽冇行盃仔都唔放過

意盃8強今晚戰火重燃，國際米蘭同博洛尼亞會喺聖西路球場正面交鋒，「藍黑兵團」想爭意甲有難度，吼實意盃反而仲實際，就算教練施特拉馬斯安尼話會派遣副選兵落場，卡士都依然高博洛尼亞一班，2.15倍「讓球主勝」博得過吖！（now633及660台周三凌晨4:00直播）

睇番意甲積分榜，家陣國米落後榜首嘅祖雲達斯7分，要後來居上唔係咁易，歐霸盃戰場亦臥虎藏龍，橫睇掂睇，似乎係意大利盃最有機！據意媒《La Gazzetta》報道，國米會收起部分主力，當中以前線變動最大，預計迪亞高米列圖會夥拍新加盟嘅洛基擔正，呢對箭頭老就係老啲，但勝在夠經驗吖嘛，對住對上7場作客場場有失波嘅博洛尼亞，夠照啦！
博洛尼亞訪聖西路冇運行

對家博洛尼亞都學人玩輪換，賽前講明會派射手艾基費斯卡等後備兵落場，畢竟佢哋今季最大目標係要護級，將火力集中喺聯賽度好正常。之不過有留意博洛尼亞嘅球迷，都知道自從加斯頓拉美利斯離隊之後，呢班波就好似冇牙老虎一樣，想喺有祖安古靴美同蘭奴捷亞兩大守將復出嘅國米後防搵着數好難！況且博洛近5次造訪國米嘅聖西路球場輸足4場，當中有3次輸波球差係2球以上，睇怕今仗都係同樣下場。

意盃賽制：今輪為8強戰，以一場過分勝負，若法定時間內打成平手，需加時作賽，再和就互射12碼決勝。