C朗餓虎出柙 皇馬大咬華倫

猪拉多纳

西班牙盃八強首回合今晚揭開戰幔，重頭戲皇家馬德里主場迎戰強敵華倫西亞。「銀河艦隊」有C朗拿度刑滿復出，攻力全面回升，今仗必趁地利數得就數，但華倫絕非善男信女，箭頭蘇爾達杜近期頻有士哥，面對有兩大中堅比比同沙治奧拉莫斯缺陣嘅皇馬防線，大有機會搵到食。既然兩大射手着晒火，大細中位數調升到3.5球冇有怕，捧大！

（now 632周三凌晨4時直播）

若要測試一個球星嘅作用，最好睇佢缺陣時隊波踢成點。歇冬後皇馬連贏兩場轟8粒，似有回勇迹象，豈料上仗聯賽冇咗儲夠黃牌而停賽嘅C朗，作客包尾大幡奧沙辛拿即刻啞火，成場波九次射門得一次中龍，最終互交白卷。
C朗留隊至2015年約滿

幸好C朗今仗可以復出，事實上佢真係弗到震，近八次披甲共有九球斬獲，停賽抖夠叉足電，而且C朗剛宣布肯定會留隊至2015年約滿，打破早前因為唔開心想離隊嘅謠傳，今仗實踩行油搏殺。由於皇馬衞冕聯賽機會渺茫，一定全力爭取西盃，首回合挾主場之利必數多幾粒，力搶出線主動權，等次回合踢得輕鬆啲。

另一邊廂華倫亦非善類，自新帥華爾維迪中途接手後，「蝙蝠兵團」精神面貌大為改善，佢帶隊八場贏七場，其中隊長蘇爾達杜最sharp醒，呢位射手近七場波射入六粒，重新激活整條鋒線。

況且皇馬兩大中堅比比同沙治奧拉莫斯因傷停缺陣，一眾蝙蝠仔會趁機搵到着數。今仗勢必合演入球騷，1.95倍入球大捧得過。