蝙蝠兵團追咬西維爾

猪拉多纳

相信留意開本地波嘅朋友，應該知道張峰經已轉會重返傑志。雖然我對嘉緯，均宜，文輝等新隊友非常熟悉，但係喺新球會第一課操練後，發覺同以前大不同，無論係訓練節奏，內容同打法，都有別於自己以前効力嗰陣，盡快適應新環境係我首要工作，我會努力以好表現，報答賞識我嘅每一位。當然，我亦希望為日之泉JC晨曦一眾隊友打打氣，雖然相處短短半年，不過足球始終係團體運動，離別會有捨不得，我相信你哋可以脫離現時不利位置，繼續努力呀！
誓保歐聯入場券

講番今晚西甲，華倫西亞會喺主場迎戰西維爾。由於今季馬德里體育會演出優異，如無意外應該會攞到一張歐聯入場券，令到爭入前4嘅競爭異常激烈。華倫依家排第8，不過同第4嘅馬拉加僅相差4分，如果想下屆繼續有得踢歐聯，下半季就要積極搶分，所以張峰相信華倫今晚可全取3分。

事實上，「蝙蝠兵團」今季主場威力依然強勁，9戰錄得6勝1和2負，勝率接近7成。反觀西維爾勁跌Watt，近4戰僅錄得1勝3負，最慘係作客腳軟問題嚴重，開季至今僅得6分落袋，今晚就算受讓平半都要唔過，要1.75倍上盤穩陣。

（now632台周日清晨5:00直播）