另類倫敦打吡 等睇「報恩」好戲

猪拉多纳

君子報仇十年未晚，夏利列納忍辱負重帶住隊昆士柏流浪，畀人笑佢埋錯堆、帶錯隊、遲早做降班領隊，點不知呢隻老狐狸一於少理，埋頭苦幹做實事，QPR終於喺上輪英超爆大冷砌低車路士，今晚撼熱刺再次合演「另類倫敦打吡」，分分鐘又有驚喜！
被炒深仇 夏利叔逐個報

「車仔」以衞冕冠軍資格參加歐聯，搞到上季排第4嘅熱刺冇得掘金，班主索性順勢炒埋夏利叔換上保亞斯，明剃佢老人家眼眉，熱刺同「車仔」，自然成為夏利叔被炒嘅元兇，QPR上仗先搞掂車路士，今晚就輪到搞熱刺！查實今場波亦係夏利列納離開熱刺後首次倒戈，佢帶QPR踢8場英超拎到9分，已經叻過曉士多多聲，球員受到佢嘅激情感染，誓要喺地頭食住個勢，上演「倫敦打吡」復仇戰！

論狀態熱刺係唔錯，保亞斯個輪換陣亦有睇頭，不過都係嗰句，夏利叔城府深不可測，相比起「初出茅廬」嘅保亞斯，領軍功力當然略勝一籌，況且熱刺陣中嘅主將，好多都係由夏利叔一手湊大，佢哋會唔會搏盡「報答」恩師，可以話係呢場波嘅另一看點。