紅軍二線兵難開入球騷

猪拉多纳

每年元旦日後嘅第一個周末，英超都會讓路畀英格蘭足總盃第3圈賽事。經過聖誕新年快車四重奏後，英超列強毫無疑問都會輪換抖吓氣，更何況只係作客非聯賽球會曼斯菲嘅利物浦，相信改以歐霸盃陣容出戰嘅「紅軍」會火力大減，入球大細中位數去到3.5球，可以考慮捧1.75倍入球細。（now633及660台周一凌晨0:00直播）
曼斯菲求和博重賽

利物浦自從不敵維拉之後，喺快車期都算係贏家，近4戰取得3勝，不過今戰難得遇上弱旅，仲唔趁機會畀班主力抖抖，有傳射手蘇亞雷斯、隊長謝拉特、中堅史卡迪爾及丹尼爾艾格都會被收起，新加盟嘅射手史杜列治就會初試啼聲，不過呢位前車仔射手今季上陣機會唔多，自去年11月17日後更休戰至今，未必能夠即時取代着晒火嘅蘇亞雷斯。

來自英格蘭第5級別聯賽嘅曼斯菲，實力毫無疑問喺利物浦之下，所以講佢哋嘅近績係點意義不大，反而作戰心態係點就更值得留意，事關呢隊喺非聯賽排第9嘅「二打六」，當然唔係以過關為目標，反而求和仲着數，事關重賽作客晏菲路的話，再多一次門票同電視直播分帳，隨時係佢哋嘅全季支出，今仗肯定係會死守。睇番之前幾屆，曼聯都曾經畀非聯賽球隊逼到重賽，當然唔代表利物浦會贏唔到，但憑佢哋嘅副選實力，好難開出入球騷。

足球重心：曼斯菲、埃皮納勒（入球細）

馬膽推介：10場G紅衣神仙

雖然睇落評分已盡，但近兩戰排喺內檔反而唔多啱呢匹後上馬發揮，今仗排喺8檔隨時更好衝，過往蔡約翰多次趁韋達停賽全面搶攻，今仗改配安國倫仍值得留意。