紅魔錘仔鬥攻唔驚瞌眼瞓

猪拉多纳

幫英超快車埋單計數，曼聯同熱刺3戰全勝表現最搶鏡，費格遜愈老愈有火，呢把火燒着晒班球員嘅鬥心，今晚足總盃對住主場有前冇後嘅韋斯咸隨時上演大龍鳳！

唔少球星唔願踢英超全因聖誕新年冇得抖，當佢哋歎緊世界嘅時候，紅魔班鬥士就殺到天昏地暗，連勝3場贏盡球迷掌聲，連老費都話要起碼撈多兩年，佢正式表態即係幫球員打支強心針！佢哋家陣以高得失球數字穩佔榜首，雖然後防經常甩漏，好在鋒線殺手有料到，先至能夠經常起死回生。

今晚對手「錘仔幫」喺自己地頭一向都唔知個「守」字係點寫，今季主場踢到依家淨係得一場冇波入，佢哋近6次對住曼聯合演21個入波，今晚睇呢場盃賽唔慌會瞌眼瞓！