車仔訪聖人「細」味魚生粥

猪拉多纳

上仗倒灶喺主場不敵昆士柏流浪，搞到班「藍戰士」冇晒「菲士」，車仔今晚喺英總第3圈造訪修咸頓，肯定會諗計省番靚個招牌，不過考慮到射手費蘭度托利斯同中場林柏特未必上陣，或多或少影響鋒力，今鋪小勝味濃，3.55倍讓球和好路。（now633及660台周六晚11:00直播）
丹巴巴亞9300萬正式上車

上仗休息嘅中場車路士夏薩特、桑馬達、拉美利斯、左閘艾殊利高爾今晚全部復出，不過後衞泰利、門將施治繼續養傷，啱啱以750萬鎊（約9,300萬港元）「上車」嘅丹巴巴亞又未必上陣，賓帥仲話明畀林柏特同費托休息，鋒力大打折扣，睇怕今仗入波未必多。

對家修咸頓最近聯賽3連和，對呢支升班球隊嚟講，英超護級大過天，盃賽絕對唔係佢哋杯茶，不過有一點要留意，就係佢哋主場防守力唔差，好少失多過1球，咁嘅環境，博車仔「讓和」之餘再玩埋2.25倍「入球細」，收錢機會應該幾高吓。